jahāñ ma.abūd Thahrāyā gayā huuñ
vahīñ suulī pe laTkāyā gayā huuñ
sunā har baar merā kalma-e-sidq
magar har baar jhuThlāyā gayā huuñ
kabhī maazī kā jaise tazkira ho
zabāñ par is tarah laayā gayā huuñ
abhī tadfīn baaqī hai abhī to
lahū se apne nahlāyā gayā huuñ
davāmī azmatoñ ke maqbare meñ
hazāroñ baar dafnāyā gayā huuñ
taras kaisā ki is dār-ul-balā meñ
azal ke din se tarsāyā gayā huuñ
na jaane kaun se sāñche meñ Dhāleñ
abhī to sirf pighlāyā gayā huuñ
maiñ is hairat-sarā-e-āb-o-gil meñ
ba-hukm-e-ḳhās bhejvāyā gayā huuñ