Waseem Tashif

baz auqat faraghat mein ek aisa lamha aata hai

Waseem Tashif

Bahawal Nagar, Punjab, Pakistan

1993

ba.az auqāt farāġhat meñ ik aisā lamha aatā hai

jis meñ ham aisoñ ko achchhā-ḳhāsā ronā aatā hai

sab us shaḳhs se mil kar bilkul tāza-dam ho jaate haiñ

phir us din tasvīr meñ sab chehra achchhā aatā hai

baaġh se phuul churāne vaalī laḌkī ko ye kyā ma.alūm

us ke qadmoñ har chaap pe phuul ko khilnā aatā hai

ham ye baat baḌe-būḌhoñ se aksar sunte aa.e haiñ

daa.eñ haath meñ khujlī ho to jeb meñ paisa aatā hai

jab bhī us ko rishte tasvīr dikhā.ī jaatī hai

us ke zehn meñ fauran mere jaisā laḌkā aatā hai

ham-sā.e ūñchī dīvāroñ se itnā farq paḌā

pahle ghar meñ dhuup aa jaatī thī ab saayā aatā hai

is āvāz ko sunñe vaale kaan mubārak kahlāte haiñ

un āñkhoñ ko dekhne vaalo ḳhvāb meñ dariyā aatā hai

Top Urdushayar.com