tuḳhm-e-nafrat bo rahā hai aadmī
ādamiyat kho rahā hai aadmī
zindagī kā naam hai jehd-e-mudām
so rahā hai so rahā hai aadmī
āgahī hai shart jiine ke liye
phir bhī ġhāfil ho rahā hai aadmī
chal sakā na raah par aslāf kī
naqsh-e-pā ab kho rahā hai aadmī
kāshif-e-zāt-e-ḳhudā thā sar-basar
ab nahīñ hai jo rahā hai aadmī
apne hī a.amāl par pachhtā ke ab
ro rahā hai ro rahā hai aadmī
qand-guftārī ai 'mohsin' ab kahāñ
zahr-āsā ho rahā hai aadmī