Dhab dekhe to ham ne jaanā dil meñ dhun bhī samā.ī hai

'mīrā-jī' daanā to nahīñ hai āshiq hai saudā.ī hai

sub.h-savere kaun sī sūrat phulvārī meñ aa.ī hai

Daalī Daalī jhuum uThī hai kalī kalī lahrā.ī hai

jānī-pahchānī sūrat ko ab to āñkheñ tarseñgī

na.e shahr meñ jīvan-devī nayā ruup bhar laa.ī hai

ek khilaunā TuuT gayā to aur ka.ī mil jā.eñge

bālak ye anhonī tujh ko kis bairī ne sujhā.ī hai

dhyān kī dhun hai amar giit pahchān liyā to bolegā

jis ne raah se bhaTkāyā thā vahī raah par laa.ī hai

baiThe haiñ phulvārī meñ dekheñ kab kaliyāñ khiltī haiñ

bhañvar bhaav to nahīñ hai kis ne itnī raah dikhā.ī hai

jab dil ghabrā jaatā hai to aap hī aap bahaltā hai

prem kī riit ise jaano par honī kī chaturā.ī hai

ummīdeñ armān sabhī jul de jā.eñge jānte the

jaan jaan ke dhoke khaa.e jaan ke baat baḌhā.ī hai

apnā rañg bhalā lagtā hai kaliyāñ chaTkīñ phuul banīñ

phuul phuul ye jhuum ke bolā kaliyo tum ko badhā.ī hai

ābshār ke rañg to dekhe lagan manDal kyuuñ yaad nahīñ

kis kā byaah rachā hai dekho Dholak hai shahnā.ī hai

aise Dole man kā bajrā jaise nain-bīch ho kajrā

dil ke andar dhuum machī hai jag meñ udāsī chhā.ī hai

lahroñ se lahreñ miltī haiñ sāgar umDā aatā hai

mañjdhār meñ basne vaale ne sāhil par jot jagā.ī hai

āḳhirī baat sunā.e koī āḳhirī baat sunīñ kyuuñ ham ne

is duniyā meñ sab se pahle āḳhirī baat sunā.ī hai