ḳhushī yaad aa.ī na ġham yaad aa.e
mohabbat ke naaz o ni.am yaad aa.e
ye kyuuñ dam-ba-dam hichkiyāñ aa rahī haiñ
kiyā yaad tum ne ki ham yaad aa.e
guloñ kī ravish dekh kar gulsitāñ meñ
shahīdoñ ke naqsh-e-qadam yaad aa.e
buroñ kā bahut naam japtī hai duniyā
jo achchhe ziyāda the kam yaad aa.e
dam-e-naz.a jūñhī ajal muskurā.ī
achānak tumhāre karam yaad aa.e
musībat meñ bhī bār-hā 'vajd' mujh ko
ḳhudā jāntā hai sanam yaad aa.e