bhañvar se bach ke vo sāhil ke paas Duub gayā
jahāñ kā dekh ke ḳhauf-o-hirās Duub gayā
ajab se ḳhauf meñ lipTā hai gaañv kā panghaT
sunā hai phir se koī devdās Duub gayā
mujhe sharāb hī itnī milī thī duniyā se
ki maare sharm ke merā gilās Duub gayā
gavāra ho na sakā us ko bahr kā ehsān
laboñ pe le ke qayāmat kī pyaas Duub gayā
kahūñ to kis se kahūñ apne dil kī taklīfeñ
mire hī ġham meñ mirā ġham-shanās Duub gayā
huā jo sāmnā sūraj kā mere zaḳhmoñ se
falak pe chhoḌ ke apnā libās Duub gayā
'nadīm' apne ġhamoñ se nikal chukā thā magar
ġham-e-jahān se ho kar udaas Duub gayā