kitnī mushkil se ġham-e-dost bayāñ hotā hai

ashk thamtā hai na āñkhoñ se ravāñ hotā hai

mutrib-e-vaqt kā āhañg badal detā huuñ

jab tire āriz-o-gesū kā bayāñ hotā hai

rañg-o-bū ban ke jo uḌtā hai shabistānoñ meñ

vo bhī hasrat ke charāġhoñ kā dhuāñ hotā hai

zindagī jabr ke dāman meñ janam letī hai

aadmī daar ke saa.e meñ javāñ hotā hai

Thahar jaatā huuñ tah-e-zulf-e-nigār-e-fardā

bār-e-imroz jo shānoñ pe garāñ hotā hai

zindagī kyā hai bas ik ḳhāna-e-mātam 'jāved'

dil dhaḌaktā hai to ehsās-e-fuġhāñ hotā hai