yaad aate hī rahe dil se nikāle hue log

kis kī mīrās the aur kis ke havāle hue log

shahr-āshob meñ aañsū kī tarah phirte haiñ

haa.e vo log kisī ḳhvāb ke paale hue log

avval avval to hamārī hī tarah lagte the

mansab-e-ishq pe aa.e to nirāle hue log

jaane kis samt unheñ talḳhī-e-daurāñ le jaa.e

apnī pahchān ko nezoñ pe uchhāle hue log

ek rut aa.ī ki ḳhushbū kī tarah phail ga.e

aur phir vaqt kī maujoñ ke havāle hue log