yaad karnā muhāl lagtā hai
hāfize kā kamāl lagtā hai
garm hāthoñ se aañch aatī hai
sardiyoñ kī vo shaal lagtā hai
vaqt ho dost yā koī pal ho
jo bhī guzrā kamāl lagtā hai
habs itnā hai merī miTTī meñ
saañs lenā muhāl lagtā hai
hijr barsā hai aañkh se jab bhī
mujh ko bhādoñ kā haal lagtā hai
kaun dekhegā haath par qismat
bas lakīroñ kā jaal lagtā hai
mausam-e-ishq aa gayā hai kyā
dastakoñ kā dhamāl lagtā hai
bad-gumānī hai us kī āñkhoñ meñ
dil ke shīshe meñ baal lagtā hai