maiñ nikal ke aa gayā huuñ tirī bandagī se aage

abhī kitnā rāsta hai mirī zindagī se aage

tirī sham.a chhoḌ aayā tirī masjidoñ meñ yārab

maiñ tujhī ko DhūñDtā huuñ tirī raushnī se aage

mirā haal ho kuchh aisā tujhe pā ke bhuul jā.ūñ

koī aisī be-ḳhudī ho mirī be-ḳhudī se aage

jahāñ maut samjhūñ apnī vahīñ zindagī javāñ ho

koī rāsta na pā.ūñ maiñ tirī galī se aage

vo charāġh jal na paa.e mile dil meñ ai 'musavvir'

koī aur shā.irī hai mirī shā.irī se aage