ik sāya-e-shām yaad aayā
ḳhushbū kā ḳhirām yaad aayā
dhoyā huā saat pāniyoñ meñ
kyā naam thā naam yaad aayā
lahje meñ shaguftagī guloñ kī
ik shusta kalām yaad aayā
achchhā huā gor tak to pahuñche
yāroñ ko salām yaad aayā
ai mauja-e-bād kyā huā hai
kyā taaza payām yaad aayā
kuchh aur zamīñ meñ gaḌ ga.e ham
jab apnā maqām yaad aayā
maqtal se muḌ aa.e ghar ko 'gauhar'
shāyad koī kaam yaad aayā