vo arzāñ to kareñ javoñ ko dīvāne bhī aate haiñ
jahāñ sham.eñ jalā kartī haiñ parvāne bhī aate haiñ
kuchh is andāz se aa.e tirī mahfil meñ dīvāne
koī ye kah to de mahfil meñ dīvāne bhī aate haiñ
ye fitrat husn kī hai vo taqāzā hai mohabbat kā
vo dil ko toḌne ke ba.ad samjhāne bhī aate haiñ
sabhī sehn-e-chaman meñ phuul chunñe ko nahīñ aate
kuchh apne dāmanoñ meñ ḳhaar uljhāne bhī aate haiñ
mohabbat ke gulistānoñ meñ phalne-phūlne vaalo
isī raste meñ aage chal ke vīrāne bhī aate haiñ
nahīñ ma.alūm tark-e-dostī ke ba.ad kyuuñ mahshar
vo tark-e-dostī par bahs farmāne bhī aate haiñ