pā-ba-jaulāñ arsa-e-sarv-o-sabā meñ aa.e haiñ
ham bhī kuchh naġhme liye shahr-e-navā meñ aa.e haiñ
ham ḳhas-o-ḳhāshāk āvāra guzargāhoñ kā bojh
raqs karne tere kūche kī havā meñ aa.e haiñ
ye fishār-e-gard-o-zulmat ye ḳharosh-e-abr-o-bād
aap hī kā dil hai milne is fazā meñ aa.e haiñ
tujh se mil kar sab se ab dāman chhuḌā leñge magar
saath jin kāñToñ ke ham rāh-e-vafā meñ aa.e haiñ
sharm ke kuchh phuul le kar kuchh nadāmat ke guhar
tere parvarda tirī daulat-sarā meñ aa.e haiñ
ab tak āñkhoñ kī namī kā silsila TuuTā nahīñ
kuchh ġhubār aise hī jī par ibtidā meñ aa.e haiñ
aaj hī dekhe the armānoñ ke ḳhvāb aur aaj hī
kuchh na.e halqe nazar zanjīr-e-pā meñ aa.e haiñ