kaun āshnā hai kis pe nazar jaa.e shahr meñ

āḳhir ġharīb-e-shahr kidhar jaa.e shahr meñ

shīshoñ se haar kar talab-e-sañg meñ koī

simTe to reza reza bikhar jaa.e shahr meñ

itnā bhī tañg arsa-e-jāñ shahr par na kar

roz ik qabīla jaañ se guzar jaa.e shahr meñ

ab tak qadam hī dhuup meñ Thahre haiñ is taraf

tū chhāñv de to dil bhī Thahar jaa.e shahr meñ

sahrā kī aag pakke gharoñ tak to aa ga.ī

ab ye bhaḌaktī aag jidhar jaa.e shahr meñ

itnā na sochtā chale bāzār meñ koī

ghar us kā muntazir ho vo mar jaa.e shahr meñ