rāheñ to bahut thiiñ zindagī meñ

ham kho ga.e ishq-o-āshiqī meñ

jo baat kisī meñ chāhte the

ab tak na milī hameñ kisī meñ

vo lamha jo tere saath guzrā

vo lamha bahut hai zindagī meñ

paikar hai vo ek sādgī kā

sau rañg haiñ us kī sādgī meñ

dariyā pe bhī jā ke lauT aa.e

Duube hue kaif-e-tishnagī meñ

anjām-e-bahār sūjhtā kyā

āġhāz-e-bahār kī ḳhushī meñ

aaise bahut āftāb ubhre

jo Duub ga.e haiñ tīrgī meñ