na ḳhālī zehn yuuñ duniyā kā rah jaa.e
ki saarā kaam naqsh-e-pā kā rah jaa.e
zamīnoñ par na yuuñ qabza kareñ shahar
koī to rāsta sahrā kā rah jaa.e
mire baare meñ lahreñ kuchh bhī socheñ
maiñ kahtā huuñ bharam dariyā kā rah jaa.e
jo rāh-e-jāñ meñ zāhir naqsh-e-jāñ ho
safar aadhā safar-paimā kā rah jaa.e
numūd-e-zaḳhm kam aur ye tamannā
qafas ho kar qafas-ārā kā rah jaa.e
alag hī us kā naġhma hai shajar par
qayām us tā.ir-e-tanhā kā rah jaa.e