maut bhī merī dastaras meñ nahīñ
aur jiinā bhī apne bas meñ nahīñ
aag bhaḌke to kis tarah bhaḌke
ik sharar bhī to ḳhār-o-ḳhas meñ nahīñ
qatl-o-ġhārat khulī fazā kā nasīb
aisā ḳhatra koī qafas meñ nahīñ
kyā sune koī dāstān-e-vafā
farq ab ishq aur havas meñ nahīñ
zulm ke sāmne ho sīna-sipar
hausla itnā ham-nafas meñ nahīñ
'josh' vo jo kaheñ karo taslīm
fā.eda kuchh bhī pesh-o-pas meñ nahīñ