letā huuñ us kā naam bhī āh-o-bukā ke saath
kitnā hasīn rishta hai merā ḳhudā ke saath
us kī qubūliyat meñ koī shak nahīñ rahā
bheje haiñ ham ne ashk bhī ab ke duā ke saath
bujhte hue charāġh ko hāthoñ meñ le liyā
is baar baazī jiit lī maiñ ne havā ke saath
aa ke bachā le maut mujhe zindagī se tū
kitnī guzārūñ aur maiñ is bevafā ke saath
tūfāñ meñ mujh ko banñā paḌā us ke dast-o-pā
'sāhil' vagarna bantī na thī nā-ḳhudā ke saath