ehsās-e-ishq dil kī panāhoñ meñ aa gayā
bādal simaT ke chāñd kī bāhoñ meñ aa gayā
iz.hār-e-ishq maiñ ne kisī se nahīñ kiyā
aur be-sabab jahāñ kī nigāhoñ meñ aa gayā
vo muskurā ke dekh rahe haiñ mirī taraf
itnā asar to ab mirī aahoñ meñ aa gayā
kyā pūchhte ho azm-e-safar kī karāmateñ
manzil kā naqsh ḳhud mirī rāhoñ meñ aa gayā
haiñ ibtidā.ī marhale ye ishq ke abhī
'sāhil' ye soz kyuuñ tirī aahoñ meñ aa gayā