nazar ko vaqf-e-hairat kar diyā hai

use bhī dil se ruḳhsat kar diyā hai

barā.e-nām thā ārām jis ko

ġhazal kah kar musībat kar diyā hai

samajhte haiñ kahāñ patthar kisī kī

magar itmām-e-hujjat kar diyā hai

galī-kūchoñ meñ jaltī raushnī ne

hasīñ shāmoñ ko shāmat kar diyā hai

basīrat ek daulat hī thī āḳhir

so daulat ko basīrat kar diyā hai

ka.ī hamdam nikal aa.e haiñ jab se

zabāñ ko sirf ġhībat kar diyā hai

suḳhan ke baab meñ bhī ham ne 'aslam'

jo karnā thā ba-ujlat kar diyā hai