talāsh jin kī hai vo din zarūr ā.eñge

ye aur baat sahī ham na dekh pā.eñge

yaqīñ to hai ki khulegā na khul sakā bhī agar

dar-e-bahār pe dastak diye hī jā.eñge

ġhunūda rāhoñ ko tak tak ke sogvār na ho

tire qadam hī musāfir inheñ jagā.eñge

laboñ kī maut se bad-tar hai fikr-o-jazb kī maut

kidhar haiñ vo jo unheñ maut se bachā.eñge

tavīl raat bhī āḳhir ko ḳhatm hotī hai

'sharīf' ham na añdheroñ se maat khā.eñge