koī fariyād tire dil meñ dabī ho jaise
tū ne āñkhoñ se koī baat kahī ho jaise
jāgte jāgte ik umr kaTī ho jaise
jaan baaqī hai magar saañs rukī ho jaise
har mulāqāt pe mahsūs yahī hotā hai
mujh se kuchh terī nazar pūchh rahī ho jaise
raah chalte hue akasr ye gumāñ hotā hai
vo nazar chhup ke mujhe dekh rahī ho jaise
ek lamhe meñ simaT aayā hai sadiyoñ kā safar
zindagī tez bahut tez chalī ho jaise
is tarah pahroñ tujhe sochtā rahtā huuñ maiñ
merī har saañs tire naam likhī ho jaise