nāyāb chiiz kaun sī bāzār meñ nahīñ

lekin maiñ un ke chand ḳharīdār meñ nahīñ

chhū kar bulandiyoñ ko palaTnā hai ab mujhe

khāne ko mere ghaas bhī kohsār meñ nahīñ

aatā thā jis ko dekh ke tasvīr kā ḳhayāl

ab to vo kiil bhī mirī dīvār meñ nahīñ

irfān-o-āgahī kī ye ham kis havā meñ haiñ

jumbish tak us ke parda-e-asrār meñ nahīñ

uglā sā mujh meñ shauq-e-shahādat nahīñ agar

pahlī sī kaaT bhī tirī talvār meñ nahīñ