raah se mujh ko haTā kar le gayā
jaan kā ḳhatra batā kar le gayā
kaT mirā ik shaḳhs apnī aan par
aur apnā sar uThā kar le gayā
ek din dariyā makānoñ meñ ghusā
aur dīvāreñ uThā kar le gayā
haath sūraj ke na jab aa.ī nadī
aag paanī meñ lagā kar le gayā
uḌtī chiñgārī ko jugnū jaan kar
tifl dāman meñ chhupā kar le gayā
muddatoñ kāñTe bichhā.e raah meñ
ek din āñkheñ bichhā kar le gayā