baat ban jaa.e jo tafsīl se bāteñ kar le

tishnagī merī agar jhiil se bāteñ kar le

jahāñ ke gaañv se tārīkī nikal saktī hai

dil agar fikr kī qindīl se bāteñ kar le

tū ḳharīdār mire dil kī zamīñ kā hai Thahar

pahle dil ruuh kī tahsīl se bāteñ kar le

ka.aba-e-dil tujhe mahfūz agar rakhnā hai

jā ke ulfat kī abābīl se bāteñ kar le

sirf qur.āñ ke alāva hai bhalā kis kī majāl

jo ki taurāt se injīl se bāteñ kar le

vo suhūlat hameñ goggle ne farāham kī hai

pal meñ insān brazil se bāteñ kar le

āqibat apnī banānī hai agar 'faiz' tujhe

nafs kī uḌtī huī chiil se bāteñ kar le