vo hai aag vo paanī hai

sab kī ek kahānī hai

un khañDarāt ke nīche bhī

jaarī naql-e-makānī hai

koī merī umr batā.e

bachpan hai ki javānī hai

ā.īne haiñ gard-ālūd

aur ḳhitta bārānī hai

ghar kā naqsha hai tayār

ab zanjīr banānī hai

haath hamāre zaḳhmī haiñ

aur chaTTān girānī hai

koī sapnā bhī dekho

vīrānī vīrānī hai

mere ghar kā sannāTā

merī hī be-dhyānī hai

hijr ko hijr na kahnā bhī

'mohsin' be-īmānī hai