muztarib haiñ sabhī taqdīr badalne ke liye
koī āmāda ho sho.aloñ pe bhī chalne ke liye
aaj ke daur meñ jiinā koī āsān nahīñ
vaqt miltā hai kahāñ gir ke sambhalne ke liye
zindagī ham ko qazā se to Darātī kyuuñ hai
ham to har-vaqt hī tayyār haiñ chalne ke liye
raaz kyuuñ saare zamāne pe ayaañ karte ho
āñsūo zid na karo ghar se nikalne ke liye
ab ke rūThe to sanam tum ko manāeñge nahīñ
ham bhī tayyār haiñ ab ḳhud ko badalne ke liye