namak kī roz mālish kar rahe haiñ
hamāre zaḳhm varzish kar rahe haiñ
suno logoñ ko ye shak ho gayā hai
ki ham jiine kī sāzish kar rahe haiñ
hamārī pyaas ko raanī banā leñ
ka.ī dariyā ye koshish kar rahe haiñ
mire sahrā se jo bādal uThe the
kisī dariyā pe bārish kar rahe haiñ
ye sab paanī kī ḳhālī botaleñ haiñ
jinheñ ham nazr-e-ātish kar rahe haiñ
abhī chamke nahīñ 'ġhālib' ke juute
abhī naqqād polish kar rahe haiñ
tirī tasvīr, pañkhā, mez, muflar
mire kamre meñ gardish kar rahe haiñ