kaam hai un kā jafā vo bā-vafā kahne ko haiñ
dete haiñ jo dard-e-dil ahal-e-shifā kahne ko haiñ
ham to samjhe the vo sāhil par utāreñge hameñ
Daal dī naav bhañvar meñ nā-ḳhudā kahne ko haiñ
fāsloñ se kam na hoñge ruuh ke rishte kabhī
vo hamesha dil meñ haiñ dil se judā kahne ko haiñ
munfarid un kī mohabbat munfarid un kī vafā
dūriyāñ rakhte haiñ phir bhī ham-navā kahne ko haiñ
un kī ik abrū kī jumbish bhī suḳhan-var hai bahut
hai zabāñ bhī un ke muñh meñ mudda.ā kahne ko haiñ
dūsroñ ko rāsta dikhlā.eñge vo kis tarah
rāh-e-gum-karda haiñ ḳhud aur rahnumā kahne ko haiñ
ho ga.ī hai āgahī un se 'sabīha' is qadar
jaan letī huuñ maiñ itnā ab vo kyā kahne ko haiñ