jo us kā khel thā yā dil lagī thī
vahī mere liye dil kī lagī thī
milā thā jab talak na saath terā
adhūrī kis qadar ye zindagī thī
samundar kī tarah dil thā ye be-kal
ajab halchal mire andar rahī thī
manāzir ho ga.e the gum yā shāyad
mirī hī aañkh be-manzar rahī thī
banā hai ajnabī lagtā nahīñ hai
kabhī mujh se koī vābastagī thī
añdherā ho gayā jaane se us ke
usī ke dam se har sū raushnī thī
'sabīha' us kī bātoñ meñ thā jaadū
sahar meñ is kī dīvānī huī thī