Khursheed Ahmad Malik

ai mere dil tujhe pata hai kya

Khursheed Ahmad Malik

Jehanabad, Bihar, India

1964

ai mire dil tujhe pata hai kyā

vo tire ġham se āshnā hai kyā

mujh meñ mātam shor kaisā hai

mere andar koī mirā hai kyā

sab se hañs ke gale jo miltā hai

shahr meñ vo nayā nayā hai kyā

zindagī dho ke roz piitā huuñ

aur piine ko kuchh bachā hai kyā

qissa-e-dil raqam karūñ kaise

ishq hai koī sāneha hai kyā

phal koī haath kyuuñ nahīñ aatā

qad meñ mujh se shajar baḌā hai kyā

tujh meñ uljhā huā maiñ rahtā huuñ

batā merā mas.ala hai kyā

kyuuñ mujhe DhūñDhtī hai purvā.ī

mere zaḳhmoñ se vāsta hai kyā

mujh ko jhūTā batā rahā hai jo

mere andar aa.ina hai kyā

kaun detā hai dastakeñ itnī

gum-shuda koī hādisa hai kyā

kaise ḳhurshīd us ko badloge

zindagī koī qāfiya hai kyā

Top Urdushayar.com