muhāsba kiyā na jaa.e is meñ kis kā kyā gayā

na mujh se hī rahā gayā na us se kuchh sahā gayā

ye dil se dil kā vāsta bhī kitnā dil-fareb hai

jagī hai dil meñ raushnī ki terā dard bhā gayā

ye kis ke naqsh-e-pā pe sab ne e.atibār kar liyā

ye kaun pesh-rau banā ki rāsta banā gayā

nazar milā ke us se merī baat tak nahīñ huī

mire muāmle meñ jaane kaun kyā lagā gayā

abhī bhī merī jeb meñ hai raushnī bachī huī

añdherā kis umiid par mire qarīb aa gayā

ye niil mujh se kah rahā hai tanz kī zabān meñ

vahāñ pe jā sadā lagā jahāñ tirā asā gayā

mujhe pata nahīñ malak ki kis maqām par huuñ maiñ

zabāñ se jo nikal ga.ī use adab likhā gayā