dard iksīr ke sivā kyā hai
zaḳhm-e-dil ke binā mazā kyā hai
merī sāñsoñ meñ bas ga.ī hai mahak
haa.e is kūche kī havā kyā hai
vasl ke chaar din to biit ga.e
sirf yādeñ haiñ ab bachā kyā hai
dil diyā jis ko vo huā ġhāfil
jurm-e-iz.hār kī sazā kyā hai
kho gayā vo jahāñ ke mele meñ
merī duniyā meñ ab rahā kyā hai
baat hotī thī kal nigāhoñ se
un ishāroñ kā ab huā kyā hai
jānte jab the ishq kā anjām
'monā' qismat se phir gila kyā hai