jab bhī jalegī sham.a to parvāna aa.egā

dīvāna le ke jaan kā nazrāna aa.egā

tujh ko bhulā ke lūñgā maiñ ḳhud se bhī intiqām

jab mere haath meñ koī paimāna aa.egā

āsān kis qadar hai samajh lo mirā pata

bastī ke baad pahlā jo vīrāna aa.egā

us kī galī meñ sar kī bhī lāzim hai ehtiyāt

patthar uThā ke haath meñ dīvāna aa.egā

'nāsir' jo pattharoñ se navāzā gayā huuñ maiñ

marne ke baad phūloñ kā nazrāna aa.egā