aur thoḌā sā bikhar jā.ūñ yahī Thānī hai
zindagī maiñ ne abhī haar kahāñ maanī hai
haath par haath dhare baiThe to kuchh miltā nahīñ
dasht o sahrā kī miyāñ ḳhaak kabhī chhānī hai
qatl ko qatl jo kahte haiñ ġhalat kahte haiñ
kuchh nahīñ zill-e-ilāhī kī ye nādānī hai
sahm jaate haiñ agar patta bhī koī khaḌke
jānte sab haiñ tirā zimma nigahbānī hai
apnī ġhairat kā samundar abhī sūkhā to nahīñ
buuñd bhar hī sahī āñkhoñ meñ abhī paanī hai