sar-e-varaq pe likhā intiqām hai shāyad
isī bayāz meñ merā bhī naam hai shāyad
kahā jo maiñ ne ki kuchh ehtijāj hai barpā
to bole zill-e-ilāhī avaam hai shāyad
uThe jo haath duā ko badal ga.e manzar
ḳhudā se merā yaqīñ ham-kalām hai shāyad
maiñ aa.uuñ tum ko na dekhūñ to phir palaT jā.ūñ
tumhārī samt se ye intizām hai shāyad
ye āb-o-gil ye shajar āsmān ye sūraj
kisī ke aane kā ye ehtimām hai shāyad
jamī huī hai nazar aaj tum pe saaqī kī
tumhāre hisse kā gardish meñ jaam hai shāyad
namāz-e-fazr meñ masjid meñ kyuuñ hai sannāTā
namāzī koī nahīñ bas imaam hai shāyad