sadā.eñ dete hue aur ḳhaak uḌāte hue

maiñ apne aap se guzrā huuñ tujh tak aate hue

phir us ke ba.ad zamāne ne mujh ko rauñd diyā

maiñ gir paḌā thā kisī aur ko uThāte hue

kahānī ḳhatm huī aur aisī ḳhatm huī

ki log rone lage tāliyāñ bajāte hue

phir us ke ba.ad atā ho ga.ī mujhe tāsīr

maiñ ro paḌā thā kisī ko ġhazal sunāte hue

ḳharīdnā hai to dil ko ḳharīd le fauran

khilaune TuuT bhī jaate haiñ āzmāte hue

tumhārā ġham bhī kisī tifl-e-shīr-ḳhār sā hai

ki uuñgh jaatā huuñ maiñ ḳhud use sulāte hue

agar mile bhī to miltā hai raah meñ 'fāris'

kahīñ se aate hue yā kahīñ ko jaate hue