sunā bhī kabhī mājrā dard-o-ġham kā kisī dil-jale kī zabānī kaho to
nikal aa.eñ aañsū kaleja pakaḌ lo karūñ arz apnī kahānī kaho to
tumheñ rañg-e-mai shaiḳh marġhūb kyā hai gulābī ho yā za.afrānī kaho to
pilā.e koī sāqi-e-hūr-paikar musaffā kashīda purānī kaho to
tamannā-e-dīdār hai hasrat-e-dil ki tum jalva-farmā ho maiñ āñkheñ sekūñ
na kah denā muusā se jaise kahā thā mirī arz par lan-tarānī kaho to
vafā-pesha āshiq nahīñ dekhā tum ne mujhe dekh lo jāñch lo aazmā lo
tumhāre ishāre pe qurbān kar duuñ abhī māya-e-zindagānī kaho to
kahāñ maiñ kahāñ dāstāñ kā taqāzā mire zabt-e-dard-e-nihāñ kā hai kahnā
phir us par ye tākīd bhī hai barābar na kahnā purānī kahānī kaho to
mire nāma-e-shauq kī satr meñ hai jagah ik jo saada vo mohmal nahīñ hai
maiñ ho jā.ūñ ḳhidmat meñ hāzir abhī ḳhud batāne ko is ke ma.ānī kaho to