basā-auqāt aa jaate haiñ dāman se garebāñ meñ

bahut dekhe haiñ aise josh ashk-e-chashm-e-giryāñ meñ

nahīñ hai taab zabt-e-ġham kisī āshiq ke imkāñ meñ

dil-e-ḳhūñ-gashta yā dāman meñ hogā yā garebāñ meñ

mubārak bādiya-gardo bahār aa.ī bayābāñ meñ

numūd-e-rañg-e-gul hai har sar-e-ḳhār-e-muġhīlāñ meñ

ziyāda ḳhauf-e-rusvā.ī nahīñ hai soz-e-pinhāñ meñ

dhuāñ hotā hai lekin kam charāġh-e-zer-e-dāmāñ meñ

hamesha pī ke mai jaam o surāhī toḌ detā huuñ

na merā dil tarastā hai na farq aatā hai īmāñ meñ

maza kyuuñ kāvish-e-zaḳhm-e-jigar kā aaj kam kam hai

namak kī koī chuTkī rah ga.ī hogī namak-dāñ meñ

janāb-e-qais ne dil se bhulāyā donoñ aalam ko

junūñ ke chaar harfoñ kā sabaq lekar dabistāñ meñ

bahār aa.ī milā ye hukm mujh ko aur bulbul ko

ki vo kaaTe qafas meñ ḳhaak chhānūñ maiñ bayābāñ meñ

tarannum-reziyāñ bazm-e-suḳhan meñ sun ke 'sā.el' kī

gumāñ hotā hai bulbul ke chahakne kā gulistāñ meñ