apnī ġhazal ko ḳhuun kā sailāb le gayā
āñkheñ rahīñ khulī kī khulī ḳhvāb le gayā
shab-zinda-dār log añdheroñ se Dar ga.e
sub.h-e-azal se kaun tab-o-tāb le gayā
uryāñ hai merī laash haqīqat kī dhuup meñ
vo apne saath yādoñ kā barfāb le gayā
aayā mare qarīb gul-e-sīm-tan kī tarah
saarā sukūn sūrat-e-sīmāb le gayā
mujh ko supurd-e-tishnagī-e-rūh kar gayā
vo apne saath bazm-e-mai-e-nāb le gayā