ai dil tire tufail jo mujh par sitam hue
pūchhe jo mujh se koī to kah duuñ ki kam hue
mere charāġh-e-zehn ko vo gul na kar sake
hālāñki sab añdhere mire dil meñ zam hue
harf-e-ġhazab se bhī hameñ mahrūm kar diyā
yuuñ be-niyāz ham se hamāre sanam hue
un kī zamīn-e-dil kā to qissa hī aur hai
varna un āñsuoñ se to sahrā bhī nam hue
ahbāb ne to rāste DhūñDe the muḳhtalif
lekin sab aa ke merī hī rāhoñ meñ zam hue
rabt-e-dilī se ḳhalq ko ab vāsta kahāñ
ab to hamā-shumā bhī asīr-e-manam hue
'arshad' fasīl-e-zehn meñ baḌhne lagā jo habs
ham shahr-e-dil meñ jā ke zarā tāza-dam hue