maslūb āftāb sar-e-shām kyuuñ huā
honā thā hādisa to lab-e-bām kyuuñ huā
jis par kisī jagah bhī mire dastaḳhat na the
mansūb mere naam vo paiġhām kyuuñ huā
vo kaun thā jo haath milā kar nikal gayā
barpā hisār-e-jism meñ kohrām kyuuñ huā
be-rāz rāste haiñ manāzir udaas haiñ
qistoñ meñ mere shahr kā nīlām kyuuñ huā
rutba milā na kyuuñ use apnoñ ke darmiyāñ
bāhar thā ḳhaas agar vo yahāñ aam kyuuñ huā
phūloñ kī vādiyoñ kī tarāvat milī unheñ
aur qahr-e-reg-zār mire naam kyuuñ huā
āñkhoñ pe mujh ko apnī bharosa nahīñ rahā
itnā ḳharāb ḳhvāb kā anjām kyuuñ huā