haath ḳhālī hai koī kañkar uThā
aañkh se Thahrā huā manzar uThā
ḳhāmushī kā tantana hai har taraf
shor ye kaisā mire andar uThā
kyā nahīñ rakkhā thā mere sāmne
phir bhī sajde se na merā sar uThā
ab bhī mālā-māl hai merā hunar
sāmne se mere sīm-o-zar uThā
maiñ bahut nādim huuñ apne kaam se
merī miTTī se nayā paikar uThā
maiñ bhī dekhūñ merā qātil kaun hai
Dhak na de merā badan chādar uThā