zabāñ ke saath yahāñ zā.iqa bhī rakkhā hai
tumhārā zikr tumhārā patā bhī rakkhā hai
sajā ke dhuup kaḌī aaj ghar se nikle haiñ
kisī ke saa.e ko zer-e-qabā bhī rakkhā hai
dhamāl ke liye kyā kam zamīn paḌtī hai
jo āsmān ko sar par uThā bhī rakkhā hai
kisī tarah se bhī raunaq baḌhe mire ghar kī
bujhā huā hī sahī ik diyā bhī rakkhā hai
mirā shi.ār ḳhayānat nahīñ amānat hai
milā hai zaḳhm jo us ko harā bhī rakkhā hai
sadā-e-dil-zadgāñ aa.e is taraf shāyad
darīcha ek makāñ kā khulā bhī rakkhā hai