guftugū kyuuñ na kareñ dīda-e-tar se bādal
lauT aa.e haiñ sitāroñ ke safar se bādal
kyā ġhazabnāk thī sūraj kī barahna shamshīr
kaale mujrim kī tarah nikle na ghar se bādal
raat kī kokh koī chāñd kahāñ se laa.e
ye zamīñ bāñjh hai barse ki na barse bādal
barf se kahiye ki sauġhāt kare un kī qubūl
laa.e haiñ aag ke dastāne safar se bādal
maiñ ki huuñ dhuup kā āzād parinda lekin
baal kyuuñ noch rahe haiñ mire par se bādal
āḳhirī ḳhat to likhūñgā maiñ lahū se ḳhud ko
ab bhī māyūs jo lauTe tire dar se bādal
na kisī jism kā jaadū na ghaTā gesū kī
'prem' kyuuñ ruuTh ga.e prem-nagar se bādal