aartī ham kyā utāreñ husn-e-mālā-māl kī
bujh ga.ī har jot puujā ke sunahre thaal kī
tum to kyā dastak nahīñ detīñ havā.eñ tak yahāñ
dil hai yā sunsān kuTiyā hai kisī kañgāl kī
dekh ai gul-pairahan tere liye pardes se
kaun laayā hai havāoñ kī mo.attar pālkī
phir ugāne do yahāñ ham ko lahū ke kuchh gulāb
aap ne to shāhrāh-e-dil bahut pāmāl kī
tū muqaddas aañkh hai ya.anī hasīñ sūraj kī aañkh
aur maiñ gahrī guphā vo bhī kisī pātāl kī
tum pilāo apne hoñToñ se agar āb-e-hayāt
pheñk deñge ham surāhī ātishīñ sayyāl kī
gungunā kar tairtā hai jis meñ ḳhushbū kā badan
'prem' terī shā.irī vo jhiil hai sur-tāl kī