gerve kapḌe badan par haath lohe ke kaḌe
le malāmat-dār suufī dar pe tere aa paḌe
iḳhtiyārāt-e-dayār-e-dahr hāsil hoñ mujhe
mehr se sonā-kashīdoñ maah se chāñdī jhaḌe
bhej de mujh ko jahān-e-hissiyāt-o-lams meñ
shor se uljhe samā.at aañkh se manzar laḌe
surḳh īñToñ kī galī tak jaa.eñ ham dīvāna-vār
daf.atan apnī nigah us ke darīche par paḌe
us ta.affun-gāh sā ik aur sayyāra bhī ho
peḌ marte hoñ jahāñ tālāb meñ paanī saḌe
har masīhā-e-zamāñ ko ḳhair-maqdam chāhiye
taaj ho kāñToñ kā sar par meḳh hāthoñ meñ gaḌe