dil ġham-e-ishq ke iz.hār se katrātā hai
aah ġham-ḳhvār ki ġham-ḳhvār se katrātā hai
ye samajh kar ke jafāoñ meñ mazā paatā hai
vo sitamgar mire āzār se katrātā hai
ho gayā us pe bhī kuchh us kī shikāyat kā asar
ab masīhā bhī jo bīmār se katrātā hai
ho rahā hai mujhe takmīl-e-mohabbat kā gumāñ
ishq ab husn ke dīdār se katrātā hai
dil-e-parvarda-e-ġham ḳhushiyoñ se yuuñ jaatā hai
'soz' ik baal juuñ aġhyār se katrātā hai