zindagī ā.īna hai ā.īna-ārā.ī hai
ajnabī bhī hai vahī jis se shanāsā.ī hai
sañg-dil sāmne aatā hai to ye sochtā huuñ
aarzū husn kī dīvār se Takrā.ī hai
aaj kī raat bhī kartā hai koī kufr kī baat
chāñd ke phuul meñ shabnam kī sharāb aa.ī hai
kis ko is daur meñ hai fursat-e-ishq-e-ḳhūbāñ
aag tere lab o ruḳhsār ne barsā.ī hai
tū nahīñ hai to har ik jur.a-e-mahtāb-sifat
yaad kī aañkh se Tapkī huī tanhā.ī hai
dil vo sahrā hai jahāñ hasrat-e-sāya bhī nahīñ
dil vo duniyā hai jahāñ rañg hai ra.anā.ī hai