Jafar Tahir

nashshe mein chashm-e-naz jo hansti nazar paDi

Jafar Tahir

Jhang, Punjab, Pakistan

1917-1977

nashshe meñ chashm-e-nāz jo hañstī nazar paḌī

tasvīr-e-hoshiyārī-o-mastī nazar paḌī

lahrā.ī ek baar vo zulf-e-ḳhirad-shikār

koī na phir bulandī-o-pastī nazar paḌī

uTThī thī pahlī baar jidhar chashm-e-ārzū

vo log phir mile na vo bastī nazar paḌī

husn-e-butāñ to ā.īna-e-husn-e-zāt hai

zāhid ko us meñ kufr-parastī nazar paḌī

yārab kabhī bul-havasoñ ko bhī de sazā

maanā hamārī jaan to sastī nazar paḌī

sū-e-chaman ga.e the bahārāñ samajh ke ham

dekhā to ek āg-parastī nazar paḌī

kaisī sabā kahāñ nasīm-e-chaman na pūchh

nāgin phuul phuul ko Dastī nazar paḌī

muddat ke ba.ad apnī taraf phir gayā ḳhayāl

tum kyā mile ki sūrat-e-hastī nazar paḌī

shabnam buuñd buuñd ne hañs hañs ke jaan

'tāhir' kiran kiran bhī tarastī nazar paḌī

Top Urdushayar.com